Арадай Хуралай һунгамалнууд гэрэйнгээ газаа хаяһан нобшо ноохойн түлөө ажаһуугшадые 2 мянгаһаа 5 мянга хүрэтэр ялада унагааха гэжэ дурадхана.
“Административна хуули хазагайруулга тухай” гэһэн Буряад Уласай хуулида хубилалта тухай хуулиин проект Арадай Хуралай эдэй засагай Хороондо ашаглагдажа байна. Уридшалан энэ асуудалаар ажалай зүблөөн эмхидхэгдээ. Тэрээндэ Арадай Хуралай һунгамалнууд, прокуратурын, байгаалиин нөөсэ ашаглалгын яаманай түлөөлэгшэд болон Загарай аймагай зүблэлэй түрүүлэгшэ Анатолий Чмелев гэгшэд хабаадалсаа. Тус хуулида нэмэлтэ хэхэ тухай һанамжа аймагай зүблэлэй һунгамалнууд оруулһан байна.
Һүүлэй үедэ гэр байрануудай дэбисхэр дээрэ ехэ нобшо ноохой үригдэнэ. Һандарһан автоунаанууд, барилгын үлдөөсэнүүд, түлеэн болон нүүрһэн хаягданхай. Гэрэй газаахи нобшо арилгаха тухай харюусалга хууляар хэндэшье даалгагдаагүй. Шэнэ хубилалтын ёһоор, эрхэтэд 2 мянгаһаа 5 мянга хүрэтэр, харюусалгата нюурнууд – табаһаа арба мянга, харин юридическэ албатан - 50 мянгаһаа 100 мянга хүрэтэр ялада ашагдаха аргатай. Нобшо гаргаха тухай хэлсээ баталагдаагүй байбал, баһал ялада унаха. Арадай Хуралай 25-дэхи сессиин хараада тус хуули табигдаха юм.
