Тус түсэл һурагшадые физкультурын хэшээлнүүдтэ самбо барилдаантай танилсуулха зорилго хараална. Хэрбээ энэ тамирай зүйлэй һонирхолыень татаа һаань, хүүгэд саг үргэлжэдэ бэеэ һоридог болохо юм.
Сентябриин 1-дэ 35-дахи дунда һургуулида баярай оршондо самбо барилдаанай танхим нээгдээ.
- Энэ һургуулида һурадаг хүбүүд болон басагадһаа бэеэ һорижо байдаг гүрэнэймнай ёһотой эрхэтэд урган гараха гэжэ найданаб, - гэжэ Арадай Хуралай Түрүүлэгшэ Цырен-Даши Доржиев амаршалгынгаа үгэ соо тэмдэглээ. – Буряадай самбогай һургуули хадаа гүрэн дотороо эгээл шангануудай нэгэн гээшэ, хүмүүжэмэлнүүдынь гүрэнэймнай суглуулагдамал командын гол хүсэн болодог.Мүнөө тус барилдаанда һонирхол ехэ болохоһоо гадна сагай эрилтээр тон хэрэгтэйболонхой. Мэдээжэ тамиршадай, тамирай һургуулинуудай хүтэлбэрилэгшэдэй, багшанарай, һоригшодой, гүрэнэй засагай зургаануудай болон олондо мэдээсэл тараадаг хэрэгсэлнүүдэй түлөөлэгшэдэй хуралдаанда хабаадаһаниинь энэ түсэл зүбшэн хэлсэлгэдэ олониитын һонирхол гэршэлнэ.
Түсэл бэелүүлгын хэмжээндэ 2 сая түхэригэй үнэ сэнтэй самбо барилдаанай 16 хибэс уластамнай абтаа. Улаан-Үдэһөө гадна Захаамин, Хяагта, Кабанска, Хурамхаан, Баргажан, Ярууна, Мухар-Шэбэр аймагуудай һургуулинууд хибэсүүдээр хангагдаха юм.
Даб дээрээ “Самбо барилдаа – һургуулида” гэһэн туршалгын түсэл гүрэнэймнай гурбан можо нютагта бэелүүлэгдэжэ байна. Тус тамирай зүйл һургуулиин программада оруулагданхай.
