Арадай Хуралай ээлжээтэ 26-дахи сессиин “Засагай газарай сагай” үедэ “МРСК Сибири – “Бурятэнерго” ПАО-гой захирал, Арадай Хуралай һунгамал Андрей Меделянов 2018-2022 онуудта Буряадта зайн галай элшэ хүсэнэй һалбари хүгжөөлгын программа тухай хөөрэжэ үгөө.
Тэрэнэй хэлэһээр, мүнөө уласай дэбисхэр дээрэ ашаглагдажа байһан зайн галай ажахы 80 гаран хубяар хуушаранхай. Уласай аймагуудай 12 һуури ба 45 таряашадай-малшадай ажахы зайн галаар хангагдаадүй.
Энэ программа зайн галаар хангалгые найдамжатай болгохые ба хэрэглэгшэдые оньһото аргаар залгахые хараална: зайн гал дамжуулдаг түхеэрэлгэнүүдые, зайн галаар хангалгын хаамал түбүүдые һэльбэн шэнэлэлгэ, нэмэлтэ хүсэнүүдые залгалга гэхэ мэтэ. Зайн галаар хангалгын шэнэ аргануудые – холимог зайн галай тоног түхеэрэлгэнүүдые – хэрэглэхээр түсэблэгдэнхэй.
Энэ хэрэгтэ 6,92 миллиард түхэриг гаргашалагдаха болоно. Тиин оройдоол 1,35 миллиард түхэригынь үнэ сэнгэй олзо оршоор хангагданхай.
- Программын гол үрэ дүн – зайн гал дамжуулдаг түхеэрэлгэнүүдэй хуушарһые үсөөлхэ, хии газар зайн гал дамжуулһанай гарза доошолуулга, Буряадта ерэхэ инвесторнүүдые хабаадуулга. Гадна бидэ уласай бүхы аймагуудта таряашадай-малшадай ажахынуудые дэмжэхэбди, - гэжэ Андрей Меделянов тэмдэглээ. – Манай һуралсалай эмхи зургаануудай ашаар мэргэжэлтэдэй талаар арга шадал хүгжөөхэ хэрэгтэй.
Элидхэгшые шагнаһанайнгаа һүүлдэ һунгамалнууд уласай зайн гал дамжуулдаг ажахын шиидхэгдээгүй асуудалнуудта анхаралыень хандуулаа: заһабарилгын ажалнуудай болзор хойшон таталга, зарим нютагуудта зайн галай ходо таһалдалга, хүдэлмэрилэгшэдэй ходо һэлгэжэ байлга, үнэ сэнгүүдэй ургалта. Һунгамал Баир Цыренов юундэ иимэ ехэ хуушаралга тохёолдооб гэжэ һонирхоо. Үшөө нэгэ һунгамал хотын Поселье, Исток, Сокол һууринуудта зайн галаар хангалга һайжаруулха хэрэгтэй гэжэ тэмдэглээ. Тиин “МРСК Сибири” – “Бурятэнерго” ПАО-до тус программа бэелүүлхын тула бюджедһээ гадуур һомололгын асуудал дээрэ хүдэлхыень дурадхагдаа.
