Ноябриин 9-дэ Улаан-Үдэ хотодо Соведүүдэй талмай дээрэ уласай аймагуудта түймэр сарадаг шэб шэнэхэн машинанууд баярай оршомдо дамжуулагдаба. Энэ хэмжээ ябуулгада Буряад Уласай Засагай газарай Түрүүлэгшын аюулгүйн асуудалнуудай талаар орлогшо Петр Мордовской хабаадалсаа.
Буряад Уласай түймэртэ эсэргүүсэлгын гүрэнэй албанай отрядуудта гэжэ “Уралай” үндэһэн дээрэ зохёогдоһон АЦ-40 түхэлэй табан автомобиль уластамнай эльгээгдэһэн байна. Бүхыдөө тэдэнэйнь хамтын сэн - 27 сая түхэриг.
“Уласай ажаһуугшадые, дэбисхэр, һуурин газарнуудые хамгаалгын, аюулгүй байлгалгын асуудалнууд Буряад Уласай Толгойлогшо Алексей Цыденовэй хинамжа доро юм. Мүнөөдэр бидэ шухала удхатай, түүхэтэ хэмжээ ябуулгада – Захаамин, Кабанскын, Мухар-Шэбэр, Ярууна ба Хори аймагуудта дамжуулагдаха табан автомобилиин түлхюур барюулха баяр ёһололдо хабааданабди. Эдэ табан нютаг газарай байгууламжануудай түймэр саралгын оньһон унаагай нэмэгдэхэдэ, байгаалиин ба оньһото түхеэрэлгэнүүдэй эбдэрһэнһээ уламжалһан гэнэ усалай тохёолдоходошье, түймэр сарагшадаймнай тэмсэхэ хүсэн бүри дээшэлхэ”, - гэжэ Петр Мордовской тэмдэглээ.
Машинанууд ажаһуугшадые, һуурин газарнуудые түймэрһөө аршалха бүхы хэрэгсэлнүүдээр хангагданхай. Тэдэ гэр байранууд ба байшангууд соо, үйлэдбэриин объектнүүд дээрэшье түймэр сараха, мүн тиихэдэ гэнэ усалай газарта түймэр сарагшадые, түймэр сарадаг оньһото зэр зэбсэгүүдые, гэнэ усалһаа абаралгын тоног түхеэрэлгэнүүдые, түймэр унтараадаг нөөсэ зүйлнүүдые абаашаха үүргэтэй. Автоцистернэ амяараа түймэр сарагша, мүн бусад автоцистернэнүүдтэй суг хамта насос шэнгеэр хэрэглэгдэхэ аргатай.
2018 оной бюджедэй түлэбтэ үшөө табан иимэ автомобиль худалдан абалгада мүнгэн хараалагданхай гэжэ һануулая.
