Больницануудые ба поликлиникэнүүдые заһабарилха, тоног түхеэрэлгэнүүдые худалдан абаха хэрэгтэ бюджедтэ мүнгэ хараалха, элүүрые хамгаалгын һалбариие оньһото мэдээсэлгын аргаар хангаха шэглэлээр һомологдодог гаргашануудые дээшэлүүлхэ. Эдэ болон бусад дурадхалнууд “Уласай 2018 оной болон 2019 ба 2020 онуудай түсэбтэ хугасаагай бюджет тухай” Буряад Уласай хуулиин түлэбые хоёрдохи уншалгада бэлдэхэ талаар хүдэлмэриин бүлэгэй зүблөөн дээрэ оруулагдаа юм. Бюджедэй, налогуудай болон сан жасын хорооной түрүүлэгшэ Зоригто Цыбикмитов энэ зүблөө хүтэлөө.
Һунгамалнууд элүүрые хамгаалгын сайдай уялгануудые саг зуура дүүргэгшэ Александр Зандановай элидхэл шагнаа. Тэрэ 2018 ондо элүүрые хамгаалгын һалбарида 10548,4 сая түхэриг хараалагданхай, энэнь 2017 онойхиһоо 9 хубяар бага гэжэ мэдээсээ. Доошололгонь элүүрые хамгаалгын эмхи зургаануудай заһабарилгада ба барилгада ехэ һомололгонуудай шэглүүлэгдэһэнһээ, мүнгэн зөөриин-оньһото хэрэгсэлнүүдэй талаар хангагдасын һайжаралгаһаа уламжалаа. Эмүүдтэ, “Хүдөөгэй эмшэн” программада, үндэр оньһото туһаламжа үзүүлэлгэдэ жэлэй туршада федеральна һомололго шэглүүлэгдэхэ гэжэ элүүрые хамгаалгын яаманай түлөөлэгшэ тэмдэглээ.
Можо нютагууд хоорондын харислаа холбоонуудай хорооной түрүүлэгшэ Цыденжап Батуев юундэ уласай 48 фельдшерэй-акушерэй пунктда фельдшернүүд дуталданаб гэжэ асуугаа. Александр Зандановай харюусаһаар, энэ асуудал шиидхэхын тула эмшэдые бэлдэдэг колледждо тус мэргэжэлээр бюджедһээ хангалгатай һууринууд олошоруулагданхай.
- Фельдшернүүдые һургажа гаргахын тула адагынь 4 жэл хэрэгтэйл, харин ФАП-ууд мүнөө хооһон ха юм. Энээниие шиидхэхэ дурадхалнуудые таанадһаа хүлеэнэбди, - гэжэ Цыденжап Батуев онсолон тэмдэглээ.
Ниигэмэй бодолгын талаар хорооной түрүүлэгшэ Александр Стопичев 2018 оной бюджедтэ элүүрые хамгаалгын һалбариин байшангуудые заһабарилгада мүнгэн хараалагдаагүй гэжэ хэлээ.
- Һунгамалнууд хэдыхэншье һаа байшан заһабарилхын тула сесси бүхэндэ заһалтануудые оруулдаг. Энэ хэрэгтэ уласай тусхай программа, жаса байха ёһотой, - гэжэ Александр Стопичев хэлээ. – Тоног түхеэрэлгэдэ баһа мүнгэн хараалагдаагүй. Мүнөө элүүрые хамгаалгын һалбари нэгэл гарта байна. Тиимэһээ яаман түрүү зорилгонуудаа элирүүлжэ, бидэнэй үзэмжэдэ табиха ёһотой.
Арадай Хуралай һунгамал Евгения Лудупова элүүрые хамгаалгын һалбариие оньһото мэдээсэлгын аргаар хангаха шэглэлээр һомологдодог гаргашануудые дээшэлүүлхэ хэрэгтэй гэжэ тэмдэглээ. Бюджедтэ энэ зорилгодо 54,3 сая түхэриг хараалагданхай. Теэд энэнь хүрэхэгүй.
Бюджедэй, налогуудай болон сан жасын хорооной түрүүлэгшэ Зоригто Цыбикмитов хүүгэдэй эмшэлэлгэдэ анхаралаа хандуулаа.
Хэды хүүгэд, илангаяа мүнгэн зөөреэр ядуу байдалтай гэр бүлэнүүдэй үхибүүд, ондоо можо нютагууд руу эмшэлүүлхэеэ ошоноб? Тэдэниие абажа ошоһон хүнүүдтэ һомололго хараалагдана гү? Бюджедтэ түсэблэгдэһэн гурбан сая түхэриг хүрэнэ гээшэ гү? – гэжэ тэрэ асуугаа.
Мүнгэн хүрэнэгүй гэжэ Александр Занданов харюусаа. Тиихэдэнь һунгамалнууд хэрэгтэй мүнгэнэйнгээ хэмжээ тодорхойлоод, дурадхалнуудые оруулхыень яаманда зууршалаа.
Уласай элүүрые хамгаалгын һалбариин гаргашануудые зүбшэн хэлсэлгэ ноябриин 16-да үнгэргэгдэхэ удаадахи зүблөөн дээрэ үргэлжэлүүлэгдэхэ юм.
