Олон жэл хүлеэгдэһэн олон хүнэй хүсэ хүдэлмэри шаардажа бүтэһэн буряад арад зоной юртэмсэдэ томохон эхилэл болоһон Буряад ФМ сентябрийн 1-эй үдэр нээлтэеэ хэжэ арад зоноо ехэдэ баярлуулаа бэлэй. Тодоруулааһаа, гарагай дүрбэндэ, буряад литээр һарын 30-да, гал нохой, модон һуудалтай, 6 сагаан мэнгэтэй үдэр Буряад орондомнай гүнзэгы удха шанартай, дэмбэрэлтэ һайхан үдэр тодороо бэлэй. Ушар юун бэ гэхэдэ, энэ үдэрһөө 90.8 гэһэн радиосубаг ажалаа эхилээ.
Энэ радиогой үүсгэн байгуулагша 24-дэхи Бандида Хамба лама Дамба Аюшеев тэргүүтэй Ородой Буддын шажантанай заншалта Сангха нүсэр ехэ ажалай саадатай гарахада туһалалсажа, аргагүй ехэ габьяа байгуулаа. Хамба лама хадаа өөрын бэеэр бүхы л бэлдэлгын ажалда оролсожо сурбалжалагшадые һунгаха, һорихо, бэлдэхэ, зааха ажалые ударидаһан байна.
Нээлтын еһололой үедэ хэлэһэн үгэдөө буряад хэлэеэ абарха, саашань хүгжөөхэ, залуу балшар үетэндөө зааха ажалда буряад радиогой ажалшад тон ехэ нүлөө үгэхэ еһотой гэжэ тэмдэглээ бэлэй.
Буряад ФМ өөрын долгинтой болохо ажалда Бүгэдэ Найрамдаха Буряад уласай Засагай газар тэрэ дунда мэдээсэлэй болон олониитын харилсаанай хорооной дарга Ирина Смоляк ехэхэн хуби нэмэри оруулжа туһалһан байна. Турэ засагай зүгhөө 2 сая 700 минган түхэриг мүнгэн туһаламжа хүргэжэ дуу, дамжуулга бэшэлгэ, сурбалжалагшадые бэлдэхэ ажалда зарсуулагдаһан байна. Саашадаашье Буряад радиогоо дэмжэжэ мүнгэн хэлбэреэр туһалха тухайгаа олондо дурдасаниинь сайхашаалтай.
Мүн хадаа радио байрлаха газарай асуудалые шийдхэбэридхэдэ Гүрэнэй Думын депутат Михиал Слипенчук туһа хүргөө. Нийтэдээ 170 гара дүрбэлжэн метр талмай гаргажа хоер студи, ажалай байрануудые түхеэрэһэн байна.
Шэнэ радиогой бусад мэдээсэлэй хэрэгсэлнүүдһээ илгараха юумэ гэбэл Буряадай нютаг нугаса бүрийн өөрсэ аялгаар яряанай хэлбэрээр эфиртэ гарахада оршоно. Иимэһээ хүн бүхэн өөрын мэдэхэ эхын һүүгээр бэедээ шэнгээһэн аялгаараа һонирхолтой хөөрөө, дамжуулга, радио-найруулга, ярилсалгануудые шагнаха ойлгохо болоно.
Түрэл буряад хэлэеэ нютаг хэлэнэй үгүүлбэриин ашаар хүгжөөн баяжуулха арюун хэрэгые эрхилжэ захалһан түрүүшын арбан табан сурбалжалагшад ажалаа эхилээд байна. «Нютагайм радио» нэрэ зүүһэн энэ радио хадаа юрын ажалша, бэрхэшүүл дархашуул, ирагуу найрагша, дууша, хүгжэм зохиогшо гэхэ мэтэ hонин содон хүнүүдтэй шагнагшадые танилсуулжа эхилээд байна.
Мүн шэнэ радиодо буддын шажанда хабаатай олон сонинууд гарана. Буряад ороной дасангуудай унзад-ламанар студи дээрэ буужа ФМ радиогоор хүн зоной зальбаран шагнажа байхыень Этигэл Хамбын зальбарал, Доншуур маани, Алтан гэрэл, Гомбо сахюсан гэдэг номуудые буряад хэлэн дээрэ уншажа эфиртэ гаража эхилбэ.
Буряад хэлэеэ нютаг хэлэнүүдэй нөөсөөр баяжуулха, Буряад оронойнгоо нютаг бүхэнэй хэлэнэй онсолиг ойлгохо, сэгнэхэ мүнөө үедэ шухала гэжэ тоологдохо ёһотой. Тиигэбэл бэеэ буряадби гэжэ мэдэрдэг хүн бүхэн өөрынгөө эхэ хэлээ дүүрэн мэдэхэ болоно.
