Мүнөөдэр 2021 жэлэй бюджет тухай хуулиин проект зүбшэн хэлсэгдээ

Эндэ ерэхэ жэлэй бюджет тухай хуулиин проект зүбшэн хэлсэгдээ. Ковид үбшэнэй һүжэрһэн үедэ ерэхэ жэлэй бюджет тухай хуулиин проект харалгада гүйсэдхэлгын засагай, олониитын эмхинүүдэй түлөөлэгшэд, хүдөө аймагуудай толгойлогшонор видеохарилсаанай аргаар хабаадаа. Москваһаа онлайн аргаар гараһан Буряадһаа федерациин соведэй гэшүүн Александр Варфоломеевай тэмдэглэһээр уласай бюджет абахын тула горитой хүдэлмэри ябуулагдажа, тэрэниие баталан абаха үлөө. Зүгөөр хүн зоной байдал һайжаруулхын тула бюджедэй мүнгэ зүб мүрөөр түсэблэжэ, алибаа һалбарида хэды шэнээн мүнгэн шэглүүлэгдэнэб гэжэ хүн зоной харахада, тон эли, тодо байха ёһотой гээд тэрэ тэмдэглээ. Тиихэдэ энэ зүблөөндэ хабаадагшад Буряадта зайн гал үнэгүй болгохо талаар ажал ябуулыт даа гээд сенаторые гуйгаа. Мүн лэ Арадай хуралай  һунгамал Тумэн Дондоковай һанамжаар пандемиин үедэ уласта олошорһон ажалгүйшүүлые регионой бюджедһөө дэмжэхэ шухала.Буряадта бэелүүлэгдэжэ байгаа гүрэнэй программанууд хүн зоной байдал болон уласай экономико хүгжөөлгын тоо баримтануудта үндэһэлэн бүридхэгдэһэн проект болоно гээд эндэ тэмдэглэгдээ. Бюджет тухай хуули баталалгаһаа уласаймнай хүгжэлтэ тон ехээр дулдыдана. Тиимэһээ һан жасын 61 процентнь элүүрые хамгаалгын, һуралсалай, соелой болон бусад социальна һалбаринуудта шэглүүлэгдэнэ гээд Арадай хуралай хорооной түрүүлэгшэ Зоригто Цыбикмитов тодорхойлоо.Эндэ мэдээсэгдэһэнэй ёһоор 3 жэлэй туршада улас дотор мүнгэнэй дутагдал үзэгдэхөөр харагдана. Мүн лэ ерэхэ жэлэй уласай олзо 72 миллиард 500 гаран миллиондо хүргэгдэхэ гээд дуулгагдаа. Зүгөөр 77 шахуу миллиард түхэриг гаргашалагдахаар түсэблэгдэнхэй. Тиимэһээ бюджедэй мүнгэн 4 миллиард 400 миллион түхэриг дуталдахаар багсаамжалагдана. Уласта ажаһуугаа арад зон бюджедэй олзобориин хуби ямар мүнгэнһөө бүридхэгдэнэб, хайшан гэжэ гаргашын мүнгэнүүд түсэблэгдэнэб, эрхэтэн бүхэнэй социальна хангалта, мүн лэ экономикын ургалта бюджедэй зүб мүрөөр түсэблэлгэһөө дулдыдаха болоно. Гэбэшье, энэ хуулиин проект ноябриин 26-да үнгэргэгдэхэ Арадай Хуралай сессидэ нэгэдэхи уншалгаар харагдахань гээшэ.

Автор: