Улас дотор һайн дураараа шуһаяа тушаалга тухай хуулиин хэр бэелүүлэгдэжэ байһан тухай асуудал Арадай Хуралай соведэй ээлжээтэ зүблөөндэ мүнөөдэр харагдаба. Донорнуудай тоо доошолоо, тиигээдшье шуһа абадаг станцида эмшэд дуталдана гээд Буряадай элүүрые хамгаалгын сайдай орлогшо Наталья Логина элидхээ. Россин мүн Алас-Дурна зүгэй тойрогой дунда зэргын дүнгүүдтэй зэргэсүүлхэдэ, недондонһоо Буряадта шуһаяа тушаадаг зон доошолоо. Хэрбэеэ 2019 ондо 6364 хүн шуһаяа тушааһан һаа, недондо тэдэнэй тоо 3 гаран процентээр буураа. Тиибэшье үбшэнтэнэй ами наһа абарха, элүүр мэндэ болгохо түсэбэй эрилтэнүүд гүйсэд дүүргэгдэжэ, хэрэгтэй хэмжээнэй шуһан суглуулагдаһан байна. Угайдхадаа, пандеми ушаржа, нилээн бэлэн бэшэ байдал гаталагдаа гээд элүүрые хамгаалгын сайдай орлогшо онсолоо. Шуһаар хангалгын амин шухала асуудалые бидэ ехэтэ дэмжэнэбди гээд Арадай Хуралай түрүүлэгшэ Владимир Павлов хэлэбэ. Бэедээ элүүр мэндэ хүн шуһаараа хубаалсажа, хэнэйб даа ами наһа абархаб гэһэн нигүүлэсхы сэдьхэлээрээ саг үргэлжэ уласайнгаа шуһа абалгын станци руу харгылдаг. Хүндэтэ донор гэһэн нэрэтэй 2235 эрхэтэн Буряадтамнай ажаһууна гэжэ Арадай Хуралай түрүүлэгшын орлогшо Цырен Доржиев тодорхойлоо. 2020 ондо уласай эмнэлгын эмхинүүдтэ 122 литр 300 грамм шуһан дамжуулагдаа. Байгша оной түрүүшын 3 һарын хугасаада 183 литр 400 грамм шуһан тараагдаад байна.
Общество
302
