Мүнөөдэр Улаан-Үдэдэ Гүрэнэй Эрмитажай «Екатерина Великая» гэһэн суглуулбариһаа уран бүтээлнүүдэй үзэмжэ баяр ёһолой оршондо нээгдээ. Манай ниислэлдэ анха түрүүшынхиеэ «Эрмитажай үдэрнүүд» гэһэн музейн фестиваль үнгэргэгдэнэ. Зүүн Сибириин болон Үбэр Байгалай хүгжэлтын түүхэдэ горитой хубитаяа оруулһан Росси гүрэнэй хатан II дугаар Екатеринэдэ зорюулагдаһан үзэсхэлэндэ XVIII –дахи зуун жэлэй мэдээжэ зурагууд олоной анхаралда табигдаа. Тодорхойлбол, Федор РОкотовой, Генрих Бухгольцын болон Иоганна Георга де Майрын тоһон шэрээр зураһан зурагууд олоной һонирхол татана. Баярта үйлэ хэрэгтэ Буряадай толгойлогшо Алексей Цыденов, Гүрэнэй Эрмитажай захиралай орлогшо Александр Прохоренко болон бусад хабаадаа. Арадай хуралай түрүүлэгшэ Владимир Павловай һанамжаар Агууехэ Екатерина хатан Буряадай хүгжэлтэдэ аргагүй ехээр нүлөөлһэн байна. Мүн лэ эндэ Хориин аймагай Анаагай дасанда бусаһан 2 дугаар Екатеринын бюст зоной анхаралда табигдаа. Тэрэнэй түүхэ тухай хэлэбэл, Буряадай түлөөлэгшэ Дамба-Доржо Заяев 2 дугаар Екатеринатай золгожо, Росси дотор Буддын шажан нэбтэрүүлгын эхин табигдаһан гээшэ гээд Анаагай дасанай шэрээтэ Лэксэк лама тодорхойлоо.
Общество
271
