Буряад Уласай Арадай Хуралай Түрүүлэгшэ Владимир Павлов Буряад Уласай байгуулагдаһаар, 99 жэлэй ойн баярта зорюулагдаһан хэмжээ ябуулгада хабаадаба. Соведүүдэй талмай дээрэ энэ баярта зорюулагдаһан концерт үнгэрһэн байна.
- Буряад Уласай Арадай Хуралай һунгамалнуудай зүгһөө амаршалнаб. Манай Буряад орон гоё һайхан байгаалитай, нөөсэ баялигуудтай, соёл түүхэтэй, ёһо заншалтай. Эгээл ехэ баялигынь хадаа, олон тоото арад зониинь болоно. Ажалша, бэрхэ манай ажаһуугшад үнэн сэхэ үгэтэй, сагаан сэдьхэлтэй зон, -гэжэ Владимир Павлов хэлээ.
Буряад Уласай Толгойлогшо Алексей Цыденовта баяр баясхаланиие хүргэхэдөө, мэргэжэл ехэтэй, урагшаа дабшаһан, олон зорилгонуудтай байһанииень тэмдэглэһэн байна. Уласай ниигэмэй-экономикын хүгжэлтэ тон амжалтатайгаар ябуулагдадаг тухай мүн лэ һанамжаяа элирхэйлээ.
- Уласай ажаһуугшад эбтэй эетэй, амгалан мэндэ ажаһууна. Түрэһэн нютагайнгаа түлөө булта оролдожо, аргагүй ехэ ажал хэдэг арад зон болоно. Суг хамта экономикын, ниигэмэй, соёлой болон бусад һалбаринуудые хүгжөөнэбди. Буряад Улас дотор шэнэ һургуулинууд, сэсэрлигүүд олоор баригдана. Хотын болбосон түхэлтэй талаар мүнөө үе сагай инфраструктура байгуулагдана. Хүдөө нютагта, үйлэдбэриин, барилгын һалбарида ехэ ажал ябуулагдана. Эдэ бүгэдэ ажалда Буряад Уласай ажаһуугша бүхэн өөрынгөө хубитые оруулна, - гээд Владимир Павлов хэлээ.
Буряадай тон эрхим, урдаа хараха уран һайханай бүлгэмүүд, зүжэгшэд энэ концертэдэ хабаадаһан байна. Концертын 2-дохи хубида залуу үетэн аймаг бүхэниие түлөөлжэ, бэлиг талаангаа харуулаа.
