«Буряад Уласай социальна-экономическа хүгжэлтые гүрэнэй талаһаа дэмжэлгэ тухай» Федерациин Зүблэлэй тогтоолой хэр зэргэ ябуулагдажа байһан асуудалаар суглаанда Буряад Уласай Арадай Хуралай Түрүүлэгшэ Владимир Павлов хабаадаһан байна.
Буряад Уластахи котельнинуудые, дулаасуулгын соргонуудые, зайн галай байшангуудые бариха, мүн һэльбэн шэнэлхэ тухай асуудалнууд зүблөөн дээрэ хэлсэгдээ. Мүн тиихэдэ үмсын гэрнүүдтэ зайн галаар дулаа дамжуулха, бог шоройн полигон бариха, һуралсалай гүрэнэй мэргэжэлэй эмхинүүдтэ ба хүүгэдэй сэсэрлигүүдтэ капитальна заһабарилга хэхэ, элүүрые хамгаалгын байшангуудые бариха тухай асуудалнуудта анхарал хандуулагдаба.
Буряад Уласай үдэрнүүдэй парламентын дээдэ палатада үнгэрһэн дүнгүүдээр Буряадай хүгжэлтын талаар Федерациин Зүблэлэй Тогтоол байгша оной февраль һарада абтаһан тухай һануулая.
-Мүнөөдэр үнгэрхэ зүблөөн дээрэ хэр зэргэ энэ Тогтоолой ябуулагдажа байһан тухай зүбшэн хэлсэхэбди. Болбосоролой, соёлой, тамирай һалбаринуудта онсо анхарал хандуулагдана. Коммунальна инфраструктура һэльбэн шэнэлхэ, аюултай ба һалаһан һандарһан гэрнүүдые усадхаха, гэрнүүдые болон бусад байшангуудые хиигээр хангаха асуудалнууд мүн лэ харагдана, - гэжэ Владимир Павлов тэмдэглэһэн байна.
Тус Тогтоолой бэелүүлгые Федерациин Зүблэлэй федеративна байгуулалтын, можонуудай политикын, нютагай өөһэдын хүтэлбэриин Хороон хинажа, саг үргэлжэ шалгалта ябуулжа байдаг тухай энэ Хорооной түрүүлэгшэ Андрей Шевченко хэлээ. Тиин Улаан-Үдэ хотын агломераци харагдажа, 73 автобус абаха мэдүүлгэдэ зүбшөөл үгтэнхэй. Буряад Уласай үндэһэтэнэй музейн шэнэ байшан бариха, «Кристалл» гэһэн ниигэмэй-соелой түб заһабарилха, «Анаагай дасанай Согшон дуган» гэһэн соёлой баялигай байшаниие хүгжөөхэ талаар ажал хэгдэнэ.
Буряад Уласай Арадай Хуралай Түрүүлэгшэ Владимир Павловай тэмдэглэһээр, «2022 оной, 2023 ба 2024 онуудай уласай бюджет тухай» хуули Арадай Хуралай һунгамалнууд харахадаа, зайн галай утаһануудые заһабарилха ба бариха түсэлэй саарһа дансануудта мүнгэ һомолхо тухай шиидхэбэри абаһан байна. Мүн Буряадай Үндэһэтэнэй музейн байшаниие барилгада, хатарай уласай колледжын байшаниие һэльбэн шэнэлэлгэдэ, Э.Раднаевай нэрэмжэтэ медицинын колледжын һуралсалай байшаниие барилгада, халдабарита үбшэнгүүдэй эмнэлгын шэнэ байшан барилгада, мүн түргэн туһаламжын больницада хирургиин корпус барилгада мүнгэн шэглүүлэгдэһэн юм.
Буряадай Арадай Хуралай һунгамалнууд түрэл уласынгаа хүгжэлтэдэ горитой хубитаяа оруулжа, онсо анхарал хандуулжа байдаг тухай Владимир Павлов тэмдэглэһэн байна. Экономикын, үйлэдбэриин, олзын хэрэгэй, инвестиционно түсэлнүүдэй хүгжэхын тула, ажаһуугшадай байдал һайн тээшэнь хубилгаха талаар ажал хэгдэнэ.
Федерациин Зүблэлэй Тогтоолой ёһоор баригдаха, мүн һэльбэн шэнэлэгдэхэ байшангуудые Арадай Хуралай һунгамалнууд сенаторнуудтай суг ябажа хараба. «Оршон хангалгын байгуулга ба зайн гал», «Экологи», «Болбосорол ба соёл», «Элүүр энхэ» гэһэн дүрбэн шэглэлээр хубааржа, тус тустаа һанамжануудаар хубаалдаһан байна.
