Буряадай Арадай Хуралай бюджедэй, татабариин ба мүнгэн һангай талаар хорооной түрүүлэгшэ Александр Бардунаев Владивосток хотодо үнгэржэ байһан Зүүн зүгэй экономическа хуралдаанда хабаадажа байна.
-Эдэ үдэрнүүдтэ ехэ удха шанартай хэмжээ ябуулга үнгэржэ байна. Россиин Юрэнхылэгшэ Владимир Путиниие анхаралтайгаар шагнаабди. Хуралдаанай үедэ олон хэлсээнүүд баталагдаа. Зүүн зүгтэ эгээл энэ үедэ тон хэрэгтэй асуудалнууд шиидхэгдэнэ. Бэе бэетэйгээ дүй дүршэлөөрөө хубаалдана. Панельнэ сессиин үедэ һонин элидхэлнүүд хэгдээ, -гэжэ Александр Бардунаев хэлэнэ.
«Алас Дурнын үйлсэ гудамжанууд» гээд нэрлэгдэһэн хэмжээ ябуулга олоной анхарал татаһан байна. Экономикын, соёлой, аяншалгын талаар 11 регионууд тус тустаа урдаа хараха шэглэлнүүдээ, түсэлнүүдээ харуулаа.
«Байгал далай - Буряадай арга боломжонууд» гээд нэрлэгдэһэн павильон соо үйлэдбэрилэгшэд, олзын хэрэг эрхилэгшэд өөрынгөө эд бараа Зүүн зүгэй экономическа хуралдаан дээрэ харуулба. Ой тайгын жэмэс, һамарһаа эхилээд, үндэһэн маягаар бүтээгдэһэн гоёолтонуул, сувенирнууд олоной анхарал татаа.
Ми-171А2 түхэлэй вертолет Улаан-Үдын авиазавод дурадхаһан байна. Зүүн зүгэй медицинын эмшэд һонирхоһон, хандаһан зоной һудаһа барижа, үбшэнгүүдэй талаар зүбшэл заабаринуудые үгөө.
Буряад Уласай эгээл томо түсэлнүүдэй нэгэн гэхэдэ, эмнэлгын ядерна түб болоно.
