Улаан-Үдэ хотын 49-дэхи һургуулида баяр ёһололой оршон байдалда тамирай талмай нээгдэбэ. «Һургуулида нэгэ сая» гэһэн түсэлэй ёһоор тамирай шэнэ талмай баригдаһан байна.
Буряадай Арадай Хуралай һунгамал Татьяна Мантатовай үүсхэлээр эмхидхэгдэһэн мүрысөөндэ Улаан-Үдэ хотын 49-дэхи һургуули илаһан юм. Энэ тойрогой гурбан һургуули тус мүрысөөндэ хабаадажа, эгээл олон дуу абаһан һургуули нэгэ миллион түхэригэй тамирай талмайтай болоһон байна. Бүхыдөө 14 081 хүн дуугаа үгэһэн юм.
- Улаан-Үдэ хотын 49-дэхи һургуули спортын талаар ходо түрүүшүүлэй тоодо ябадаг гээшэ. Минии үшөө һуража байха үедэ, тамирта дуратай хүбүүд басагад һара бүри элдэб шагналнуудые абадаг һэн. Тойрогоймнай ажаһуугшад эдэбхитэйгээр дуугаа үгэжэ, эгээл эрхим һургуули элирүүлһэн байна. 6 мянга гаран зон, тэдэнэй тоодо һурагшад, багшанар, һургуули түгэсхэгшэд энэ проектын түлөө дуугаа үгөө, -гэжэ Татьяна Мантатова хэлэнэ.
«Улаан-Үдэ хотын юрэнхы болбосоролой 49-дэхи һургуули» гэһэн нютагай засагай бэеэ дааһан һуралсалай эмхиин захирал Людмила Попова Татьяна Мантатовада баяр баясхаланаа мэдүүлжэ, тойрогойнгоо хүгжэлтэдэ горитой хубитаяа оруулдагыень тэмдэглэһэн байна.
