Буряад Уласай Арадай Хуралай социальна политикын хорооной һунгамалнууд Игорь Марковец түрүүлэгшэтэеэ Ивалгын аймагта нүүдэл зүблөө үнгэргэбэ. Мүнөө сагта тус аймагта хүдэлхэ багшанар хүрэнэ гү, мэргэжэл дээшэлүүлхын талаар ямар ажал хэгдэнэб, мүн һурагшадые халуун эдеэгээр хангалгын асуудалнууд хэр зэргэ шиидхэгдэнэб гэжэ зүблөөнэй үедэ хэлсэгдэһэн байна.
Буряадай Арадай Хуралай һунгамалнууд Игорь Зубарев, Тумэн Дондоков, Буряад Уласай болбосоролой ба эрдэм ухаанай сайдай 1-дэхи орлогшо Наталья Сандакова, «Ивалгын аймаг» гэһэн нютагай засагай байгууламжын толгойлогшо Николай Емонаков гэгшэд зүблөөнэй ажалда хабаадаа.
Поселиин, Һужаагай, Ивалгын һуралсалай эмхи зургаануудта хүрэжэ, тэндэхи багшанартай, һурагшадтай уулзалга үнгэргэһэн байна.
Ивалгын аймагай һуралсалай эмхи зургаануудта 545 багша хүдэлдэг юм. Байгша ондо залуу 8 мэргэжэлтэд аймагай һургуулинуудта хүдэлхэеэ ерээ. Залуу багшанарые дэмжэлгын программанууд аймаг дотор хараалагданхай байна. Коммунальна хангалтын талаар хүнгэлэлтэ абана, түрүүшын 3 жэл соо мүнгэ салин дээрэнь 30 процент нэмэгдэдэг юм. Түлөөһэгүйгөөр заочно һуралсал гараха, мэргэжэл дээшэлүүлгын курснуудые эмхидхэхэ тухай уулзалгын үедэ асуудалнуудые багшанар табиһан байна.
- Мүнөө үедэ шэнэ олон һургуулиинууд, хүүгэдэй сэсэрлигүүд баригдана. Багшанарые бэлдэн һурган гаргаха асуудал тон шухала. Эртээнһээ энэ талаар ажал ябуулжа эхилээбди. Ивалгын аймагта залуу багшанар олон байна. Һургуулинуудта ажалда абахадаа, залуушуулые һонирхуулха элдэб программанууд ябуулагдана. Нүүдэл зүблөөнэй үедэ үшөө нэгэ шухала асуудалда анхаралаа хандуулаабди. Энэ хадаа халуун эдеэгээр һурагшадые хангалга болоно. Мүнөө үеын сагта тааруугаар зохёогдонхой эдеэ хоол бэлдэлгын цех үгы. Жэшээнь, Һужаагай юрэнхы болбосоролой дунда һургуулида 900 үхибүүн һурана. Харин тэндэхи буфет соо 64 һурагша хабшалдаха баатай. Энэ хадаа ехэ бэрхэшээл гээшэ. Манай үхибүүд шанар һайтай эдеэ хоол абаха ёһотой. Тус асуудал Оросой Холбооной зэргэдэ шиидхэгдэжэ, шэнэ цехууд баригдаха гэжэ ехэ найданабди. Харин шэнэ һургуулинуудта эдеэ хоол бэлдэдэг тусхай цехтэй. Амтатай, гол түлэб шанар һайтай эдеэ хоол абана, - гэжэ Игорь Марковец хэлэнэ.
Зүблөөнэй үедэ хэлсэгдэһэн дурадхалнууд сентябриин 29-дэ үнгэрхэ түхэреэн шэрээ дээрэ зүбшэгдэхөөр хараалагдана. «Буряад Уласай болбосорол тухай» хуулиин хэр зэргэ ябуулагдажа байһан тухай, тодорхойлбол, багшанарые бэлдэлгын, тэдэнэй мэргэжэл дээшэлүүлгын талаар ямар ажал ябуулагданаб гэжэ Арадай Хуралай һунгамалнууд зүбшэхэ байна.
