Хорон хамшагта дайруулжа наһа бараһан эмшэдтэ зорюулагдаһан мемориальна тэмдэгэй нээлгын баяр ёһололдо Буряад Уласай Арадай Хуралай Түрүүлэгшэ Владимир Павлов хабаадаба.
- 2020 нэн түрүүн манай эмшэд ами наһаяа хайрлангүй, энэ муухай үбшэнтэй тэмсэжэ эхилһэн байна. Хэдэн мянган зониие абарһан эмшэдтэ баяр баясхалан хүргэнэб! Мүнөө үедэ энэ хорон хамшаг үлэһэн зандаа. Эмшэдэй оролдолгоор, хүн зон бэеынгээ элүүр энхэдэ ехэ анхарал хандуулдаг болоо. Бүхы эмшэдтэ доро дохинобди, -гэжэ Владимир Павлов хэлэбэ.
Наһа бараһан эмшэдэй дурасхаалда мемориальна энэ хүшөө зорюулагдаа. Буряад Уласта пандемиин үедэ COVID-19 үбшэндэ дайруулжа, 12 эмшэн наһа бараһан юм.
-Улаан-Үдэ хотын түбтэ, 1-дэхи поликлиникын хажууда олон зон ябадаг гээшэ. Энэ хүшөөгэй хажуугаар гарахадаа, ами наһаяа алдаһан эмшэдые дурсажа, доро дохин баяраа мэдүүлхэ аргатайбди. Хүшөө бодхоохо хэрэгтэ горитой хубитаяа оруулһан зондо һайниие хүргэнэб, -гэжэ Буряад Уласай Арадай Хуралай Түрүүлэгшэ хэлэнэ.
Нёдондо жэл нигүүлэсхы сэдьхэлэй ябуулга эмхидхэгдэжэ, 2 сая түхэриг суглуулагдаһан байна. Энэ хэрэгтэ Буряадай Арадай Хуралай һунгамалнууд эдэбхитэйгээр хабаадаһаниие онсо тэмдэглэлтэй.
