Буряад Уласай Толгойлогшын захиралаар 2022 ондо ДНТ ба СНТ-эйнүүдэй бэрхэшээл шиидхэхэ талаар ажал эхилһэн байна. Зайн гал заһаха мүн шэнэлэлхэ хэрэгтэ 56,8 сая түхэригэй субсиди Улаан-Үдэ хотодо һомологдоһон юм. Мүнөөдэрэй талаар 10 мянга гаран хотын ажаһуугшадай 10 ДНТ ба СНТ-эйнүүдтэ зайн галай утаһан шэнэлэгдээ. Энэ хадаа хото шадархи зуһалангуудай мүн саад ургуулдаг коммерческэ бэшэ эмхинүүдэй бэрхэшээлнүүдые шиидхэхэ программын түрүүшын дүн болоно.
Алексей Цыденов «Профсоюзник» СНТ-эйн зайн галай капитальна заһабарилгые апрелиин 5-да шалгаһан байна.
-Хэгдэһэн ажалай үрэ дүнгүүдэй нэгыень харабабди. 8 ДНТ ба СНТ-эйнүүдтэ энэ ажал «Россети Сибирь» ябуулаа. Улаан-Үдэ хотодо, Ивалгын болон Загарайн аймагуудта энэ ажалаа үргэлжэлүүлхэбди. Саашаа ажалаа ябуулхабди, - гэжэ Алексей Цыденов тэмдэглэбэ.
13 ДНТ ба СНТ-эйн зайн галай объектнууд «Бурятэнерго» компанида дамжуулагдаа. Советскэ районой «Зенит» СНТ ба Железнодорожно районой «Удинский» ДНТ Улаан-Үдэ хотын бүридэлдэ оруулагдаба.
2022 ондо 13 ДНТ ба СНТ-эйнүүдэй 8-ниинь заһабарилагдаһан байна. Энэ хадаа СНТ «20 лет Победы», СНТ «Профсоюзник», СНТ «Урожай», ДНТ «Удачное», СНТ «Пионер- 2», ДНТ «Градостроитель», СНТ «Пионер-1», СНТ «Металлист» гэгшэд болоно.
-Би өөрынгөө талаһаа юун гэжэ хэлэхэ байнабиб гэхэдэ, Алексей Самбуевич холын хараа бодолтой хадаа, энэ бэрхэшээлдэ анхаралаа хандуулжа, зайн галай утаһануудые заһабарилха, шэнэлэлхэ хэрэгтэ мүнгэ һомолоо. Ондоо регионуудта энэ проект жэшээ боложо үгэхөөр, -гээд «Россети Сибирь» компаниин генеральна захирал Павел Акилин тэмдэглээ.
ДНТ-эйнүүдые шанар һайтай зайн галаар хангаха асуудал шухала зандаа. Арад зон хэрэглэхэ хүсэнһөө үлүү зайн гал хэрэглэнэ.
-РЭС-тэ ямаршье мэдүүлгэ бэшэнгүйгөөр ехэнхи зон зайн галаар дулаа дамжуулдаг түхеэрэлгэнүүдые табина. Анхан сагһаа эндэ татагданхай зайн галай утаһан шанга хүсэтэй түхеэрэлгэнүүдтэ таарахагүй зэргэтэй. Үлүү хүсэ хэрэглэхэдэ, зайн галай үзүүр ниилэлгэ болоно ха юм. Хэды шэнээн зайн гал хэрэглэхэ тухай мэдээсэл заал һаа үгтэхэ ёһотой. «Сэбэр агаар» гэһэн программада ехэтэ найданабди. Зайн галай инфраструктура дууһан шэнэлэгдэхэ, экологи һайжарха гэхэ мэтэ хэдэн һайн нэмэлтэнүүдтэй, -гээд Павел Акилин хөөрэнэ.
ДНТ ба СНТ-эйнүүдэй зайн галай шанар ажаһуугшадай өөһэдын ябуулгаһаа дулдыдаха зэргэтэй.
-Энэ хадаа үмсын газар ха юм. Үшөө анхан байгуулагдахаһаа хойшо эндэ газарнууднай өөһэдын эзэдтэй байна. Зарим ДНТ ба СНТ-эйнүүд хаягданхай, ямаршье эмхидэ хабаатай бэшэ байна. Нэн түрүүн тэндэхи зайн галай утаһануудые «Бурятэнерго», «Россети Сибирь» компанинуудта дамжуулха хэрэгтэй. Тэрэнээ удаа зайн гал шэнэлхэ талаар ажал ябуулагдадаг юм. Ажаһуугшад энэ талаар харюусалгатай байха ёһотой. Аюулай болохогүйн тула, зайн галнуудые шэнэлхэ хэрэгтэй. Хоёр тала бэ бэеэ ойлгожо хүдэлхэ хэрэгтэй. Бидэ өөһэдын талаһаа ажалаа эхилээбди, -гэжэ Алексей Цыденов ойлгуулжа хэлэбэ.
