Буряад Уласай элүүрые хамгаалгын эмхинүүдтэ эмнэлгын туһаламжа хүргэхэ 70 автоунаануудай, мүн түргэн туһаламжа үзүүлхэ 9 машинын, нүүдэл гурбан эмнэлгын комплексын түлхюурнууд барюулагдаба. Энэ хэмжээ ябуулгада Буряад Уласай Толгойлогшо Алексей Цыденов, Буряад Уласай Арадай Хуралай Түрүүлэгшэ Владимир Павлов, социальна политикын хорооной түрүүлэгшэ Игорь Марковец гэгшэд хабаадаһан байна.
- Эхин эмнэлгын туһаламжа болбол элүүрые хамгаалгын байгуулалтада 60 процент бүридүүлнэ. Шанар һайтай эмнэлгэ үзүүлхын тула, эмшэд туһа түргэн дары хүргэхэ ёһотой. Мүнөө энэ автоунаанууд ехэ хэрэгтэй байха зэргэтэй, - гээд Владимир Павлов хэлэнэ.
Бэшүүрэй түбэй больницын ахамад эмшэн Олеся Спиневагай тэмдэглэһээр, 2018 онһоо 10 автоунаа аймагта дамжуулагдаа.
- Мүнөөдэр «Лада-Грант» түхэлэй 5 машина, үшөө тиихэдэ 4 «Нива» абажа байнабди. Намартаа үшөө нэгэ УАЗ машина үгтэхэ түсэбтэй. Эмшэд, фельдшернууднай аргагүй ехэ баяртай. Эмнэлгын хангалта үзүүлхэдэмнай, ехэ түргэн, шанартай болохо, - гээд тэрэ хэлэбэ.
