Буряад Уласай Арадай Хуралай Түрүүлэгшэ Владимир Павлов Хяагтын аймагай байгуулагдаһаар, 100 жэлэй ойн баярта зорюулагдаһан хэмжээ ябуулгануудта хабаадаба.
«Хяагтын аймаг мүнөө үедэ хүгжэлтын шэнэ шатада ябана. Тамирай, соёлой, болбосоролой ба элүүр энхын һалбаринуудта һайн дүнгүүдые харуулна гээд тэмдэглэхэ шухала. Эндэ аймагые хүтэлбэрилэгшын үүргэ тон ехэ. Бүхы ажаһуугшадта баяр баясхаланаа мэдүүлнэб. Нютагаа дээшэнь үргэжэ, холо ойгуур суурхуулжа ябахаһаа үнэтэй сэнтэй юумэн үгы», - гээд Владимир Павлов хэлэбэ.
Аймагай 100 жэлэй ойн баяртай дашарамдуулан, ажалдаа шалгарһан, олон жэлдэ үнэн сэхээр хүдэлһэн зондо Арадай Хуралай баярай бэшэгүүд, Хүндэлэлэй грамотанууд барюулагдаа.
Владимир Павловай тэмдэглэһээр, Хяагтын аймаг аяншалга хүгжөөдэг аймагуудай нэгэн болоно. Хүршэ Монгол оронтой нягта харилсаатайгаар хүдэлхэдөө, эндэ худалдаа-наймаан эршэтэйгээр эрхилэгдэнэ.
«Баян түүхэтэй Хяагтын аймагһаа сайн зам эхилһэн гээшэ. Түрэл нютагаа дээшэнь үргэжэ ябаһан арад зон - аймагай эгээл ехэ баялиг мүн. Түрэл хэлэеэ, ёһо заншалаа, соёл түүхэеэ нангинаар хадагалжа, сахижа ябадаг арад зондо алдар соло. Эхэ Ороноо хамгаалхаяа сэрэгэй тусхай операцида хүбүүднай хабаадана. Эрэлхэг зүрхэтэй, баатар хүбүүдэй дунда хяагтынхид олон. Бултанда баярые хүргэнэб», -гээд Владимир Павлов тэмдэглээ.
Һайндэрэй эхилхын урда тээ Россиин Герой Д.Фаршиневай нэрэмжэтэ сэсэрлиг хүрэжэ, сэрэгшын мүнхэ дурасхаалда зорюулжа, гүрлөө сэсэгүүдые хүшөөдэнь табиһан байна.
