Буряадай түрүүшын Юрэнхылэгшэ Леонид Потаповта зорюулагдаһан шэнэ номтой танилсалгын ёһололдо Буряад Уласай Арадай Хуралай Түрүүлэгшэ Владимир Павлов хабаадаба.
«Леонид Васильевич ехэ һонор ухаатай, холын хараа бодолтой хүн ябаа. Эгээл хүндэ сагта Юрэнхылэгшээр хүдэлһэн намтартай. Буряадай арад зон Леонид Потаповые ехэ хүндэлдэг байһан юм. Манай зүрхэ сэдьхэлдэ хэтын хэтэдэ дурасхаал болон үлэхэ», -гээд Владимир Павлов хэлээ.
Мянган хэһэгтэй ном хэблэгдэхэ хэрэгтэ Буряад Уласай ветерануудай зүблөөнэй түрүүлэгшэ Геннадий Айдаев оролдожо, ехэ үүргэ дүүргэһэн байна.
Леонид Васильевичай басаган Татьяна Леонидовна аба тухайгаа, тэрэнэй абари зан ба гэр бүлын заншал тухай тодорхойгоор хөөрэжэ үгөө.
«Манай абамнай гэр бүлын жэшээ байһан юм. Ямаршье ажал хэхэдээ, тон харюусалгатайгаар, анхаралтайгаар ябуулдаг байгаа. Түрэл гаралнай манайда ерэжэ, абадамнай ходо хандадаг байһан. Зүб заабари үгэхэ, хэрэгтэй үгэнүүдые хэлэжэ, туһалха, дэмжэхэ гэжэ ходо оролдодог байгаа. Ажалһаа сухарихигүй, ямаршье асуудал шиидхэжэ шададаг һэн».
Леонид Потапов тухай хэблэгдэһэн ном соо Буряад Уласай Арадай Хуралай Түрүүлэгшэ Владимир Павлов өөрынгөө һанамжа бэшэһэн байна. Бэрхэ хүтэлбэрилэгшэ ябаһан тухайнь, уласаа хүгжөөхэ талаар ямар ажал ябуулдаг байһан тухайнь бэшэжэ, олон уншагшадай анхарал татаһан байна.
