Буряад Уласай Арадай Хуралай Можонууд хоорондын харилсаанай, үндэһэ яһатанай асуудалнуудай, залуушуулай бодолгын, олониитын ба шажанай нэгэдэлнүүдэй талаар хорооной түрүүлэгшэ Виталий Лыгденов Улаан-Үдэдэхи Монголой юрэнхы консул Дэмбэрэл Нямцэрэнтэй уулзалга үнгэргэбэ.
Росси-Монгол гүрэнүүдэй хоорондохи харилсаанай хүгжэлтэ, парламентнуудай суг хамта харилсажа хүдэлхэ асуудалнуудые зүбшэн хэлсэһэн байна.
«Хэр угһаа хойшо хүршэ Монгол оронтой нягта харилсаатайгаар хүдэлдэгбди. Хоер талада аша үрэтэй хэлсээнүүдэй ёһоор, аяншалгын, экономикын, хүдөө ажахын һалбари хүгжэнэ. Монгол ба буряад арадуудай хани барисаанай түүхэ баян», -гээд Виталий Лыгденов тэмдэглээ.
Буряад Уласай Арадай Хуралай ба Монгол Гүрэнэй ехэ Хуралай дунда баталагдаһан холбооной үүргэ ехэ удхатай байһан тухай уулзалгын үедэ хэлсэгдэһэн байна.
Буряад Уласай Арадай Хуралай Можонууд хоорондын харилсаанай, үндэһэ яһатанай асуудалнуудай, залуушуулай бодолгын, олониитын ба шажанай нэгэдэлнүүдэй талаар хорооной түрүүлэгшын орлогшо Баир Цыренов үгэ хэлэхэдээ, Буряад Уласай ба Монгол гүрэнүүдэй харилсаан жэл ошохо бүри бэхижэнэ, шэнэ шатада гаража байна гээд тэмдэглээ.
Уулзалгын түгэсхэлдэ бэлэгүүдээрээ андалдаһанай удаа, фотозурагаа суг хамта буулгаһан байна.
