Буряад Уласай Арадай Хуралай Эдэй засагай бодолгын, байгаали ашаглалгын ба байгаали хамгаалгын хорооной түрүүлэгшын орлогшо Бадмадоржо Жигжитов Буряадай Үндэһэ яһатанай 1 –дэхи лицей интернадай байгуулагдаһаар, 30 жэлэй ойн баярта хабаадаба. Энэ үдэр һуралсалай эмхиин захирал ябаһан Жалсан Батуевич Санжиевай дурасхаал мүнхэлһэн мемориальна самбар тодхогдоо. Түрэл һургуулиингаа баяр ёһололдо тэндэ хүдэлһэн багшын ажалай ветеранууд, һургуули түгэсхэгшэд ерэһэн байна.
Арадай Хуралай һунгамалнуудай зүгһөө Бадмадоржо Жигжитов амаршалгын үгэ хэлэхэдээ, Жалсан Батуевичтай нэгэ аймагай байһандаа, аргагүй ехээр омогорхоноб гээд тэмдэглэһэн байна.
«Би жааханһаа Жалсан Батуевичые таниха байгааб. Мүнөө түрэл хүбүүнтэйнь, Түмэн Жалсановичтай самбогоор суг ажал ябуулнабди. Яруунын аймагай урдаа хараха хүнүүдэй нэгэн, манай хүндэтэ багшада алдар соло! Буряад хэлэеэ, ёһо заншалаа, соёл түүхэеэ хүгжөөхэ хэрэгтэ ямар ехэ ажал ябуулаабдаа. Мүнөөдэр дурасхаалынь мүнхэлэгдэжэ, түрэл һургуулидань мемориальна самбар нээгдэбэ», - гээд Бадмадоржо Жигжитов хэлээ.
Буряадай үндэһэ яһатанай 1-дэхи лицей-интернадай захирал Булат Шойнжонов үгэ хэлэхэдээ, һургуулиин дэргэдэ Жалсан Батуевичта зорюулагдаһан дурасхаалай самбар тодхохо хэрэг дэмжэжэ, эмхидхэлэй талаар ехэ ажал ябуулаа. Энэ хэрэгтэ һургуули түгэсхэгшэд ехэ туһа хүргөө.
«Буряад Уласай түрүү, урдаа хараха һургуулинуудай нэгэн болохо манай 1-дэхи лицей-интернат байгуулагдаһаар, 30 жэлэйнгээ ойн баярые угтажа байнабди. Мүнөөдэр хүндэтэ Жалсан Батуевичаа дурсажа байхадаа, тэрэнээ ябуулһан ажалые заатагүй тэмдэглэхэ шухала», гээд Булат Шойнжонов хэлэбэ.
Һургуулиин түүхэ ба багшын ветеранууд тухай бэшэгдэһэн шэнэ номтой танилсалга үнгэрөө. Мүн тиихэдэ лицей-интернадай ойн баярта зорюулагдаһан үзэсхэлэн эмхидхэгдэһэн байна.
