Самбогоор Буряад Уласай Арадай Хуралай шанда хүртэхын талаар мүрысөөн үнгэрбэ. Бүхэроссиин «Самбо hургуулинуудта» гэhэн түсэлэй ёhоор энэ хэмжээ ябуулга эмхидхэгдээ. Нээлгын баяр ёhололдо Буряад Уласай Арадай Хуралай Түрүүлэгшэ Владимир Павлов хабаадаба.
«Буряадтамнай самбо гэһэн спортын зүйл ехэ мэдээжэ. Арадай Хуралай һунгамалнууд энэ турнир эмхидхэн байгуулһан байна. «Самбо һургуулинуудта» гэһэн проектын ёһоор һоригшод тусхай һуралсал гаража, самбо заажа эхилээ. Энэ мүрысөөн заншалта боложо, жэл бүри хабаадагшадай тоо олон болоно. Хуралай һунгамалнууд энэ хэмжээ ябуулга булта дэмжэнэ», - гээд Владимир Павлов тэмдэглээ.
Буряад Уласай 6 аймагһаа 170 тамиршан ерээ, мүн тиихэдэ Эрхүү можын Усть-Ордын тойрогһоо хабаадагшад ерэһэн байна.
2018 онһоо энэ турнир эмхидхэгдэжэ эхилһэн юм. Мүнөөдэрэй талаар 2 мянга гаран үхибүүд самбогоор бэеэ һорино.
Самбогоор Буряадай Федерациин юрэнхылэгшэ, Буряад Уласай Арадай Хуралай хорооной түрүүлэгшын орлогшо Бадмадоржо Жигжитовай тэмдэглэһээр, жэл бүри эндэ тэндэһээ хабаадагшад ерэдэг болоһониинь һайшаалтай.
Мүрысөөнэй дүнгүүдээр Сэлэнгын аймагай Гусиноозерскын 5-дахи дунда һургуулиин команда түрүүшын һуури эзэлээ. 2-дохи һуурида Гусиноозерскын 4-дэхи һургуули, Яруунын Нарһатын 1-дэхи һургуули 3-дахи һуури эзэлээ.
