Москва хотын ВДНХ дээрэ эмхидхэгдэһэн уласхоорондын «Россия» үзэсхэлэндэ Буряад Уласай үдэр ноябриин 15-да үнгэрбэ. Буряадай уран һайханай коллективууд эгээл эрхим номернуудаа тэндэ харуулаа. Буряад ёһо заншалаар түрэ найр үнгэрөө. Буряад Уласай ниигэмэй-экономическэ хүгжэлтэ тухай Буряадай Толгойлогшо Алексей Цыденов хөөрэжэ үгэһэн байна.
Буряадай габьяата зүжэгшэд Бадма-Ханда Аюшеева, Тимур Болотов, Сэсэг Аюшеева, арадай хүгжэмэй ба хатарай «Забава» театрай дуушад ВДНХ-гай театральна талмай дээрэ гаража, аялга дуугаа хангюурдаа.
Буряадай олзын хэрэг эрхилэгшэд эд бараагаа абаашажа, тэндэ харуулаа. Буряадай үндэһэн эдеэн, сувенирнууд, хубсаһа хунар олоной анхарал татаһан байна. «Орда» ресторанай шеф-тогоошон мастер класс харуулхадаа, яагаад бууза, хуушуур, холисо болон бусад эдеэнүүд хэгдэдэг бэ гэжэ хөөрэжэ үгөө. Буряадай мэдээжэ уран зураашан Зоригто Доржиев «Буряад орониие зура» гэһэн түсэл эмхидхэһэн байна. Үзэсхэлэндэ ерэгшэд шагай наадажа һураа, модоор һиилэжэ һураа. Мүн тиихэдэ мориной дэлһэ хэрэглэжэ, бүтээлнүүдые хээ. Баунтын аймагһаа гарбалтай Дмитрий Баранов Надежда Пархонова хоёр буряад түрэ хэжэ, «хүнжэлэй найр» эмхидхэжэ, айлшадые гайхуулба.
Буряад Уласай Толгойлогшын хабаадалгатайгаар суг хүдэлхэ тухай хэдэн хэлсээнүүд баталагдаа. Б.Ельцинэй нэрэмжэтэ юрэнхылэгшын номой сангай генеральна захирал Юрий Носовтай хэлсээн баталагдаа. Тиигэжэ Буряадай ажаһуугшад «Юрэнхылэгшын номой сангай» жасада орожо, хараха аргатай болоо. Номой ба газетэнүүдэй электронно копи, архивна саарһа дансануудые, аудио ба видеозаписьнуудые, фтозурагуудые, эрдэмэй-баримтата фильмнүүдые, автореферат ба диссертацинуудые эндэ хаража болоно.
«Новикомбанкын» правление түрүүлэгшэ Елена Георгиеватай Алексей Цыденов хэлсээ баталжа, гар табиһан байна.
«Цифровая экономика» гэһэн АНО-гой захирал Сергеем Плуготаренкотой мүн лэ хэлсээн баталагдаа.
Һайндэрые шэмэглэһэн концерт үргэн дэлисэтэйгээр эмхидхэгдэжэ, арад зониие баярлуулһан байна. Монгол туургата арадуудай һүр һүлдэ үргэһэн удхатай концерт наадан нюдэ баярлуулаа, шэхэ хужарлуулаа. Энэ үдэртэ «Забава» театр, Буряадай гүрэнэй цирк, дуу хатарай «Байгалай долгинууд», «Белый день» ансамбльнууд, мүн эвенк арадай соёл харуулһан «Гулувун» ансамбль хабаадаһан байна.
