Захааминай аймагай Утата нютагта бага эмнэлгын-акушерэй газар ашаглалгада тушаагдаба. Нээлгын баяр ёһололдо Буряад Уласай Арадай Хуралай һунгамал Геннадий Доржиев хабаадаһан байна. Нютагаархидаа амаршалхадаа, шэнэ ФАП-ай барилгада хубитаяа оруулһан зондо баяраа мэдүүлээ.
«Үндэһэн «Элүүр энхэ» түсэлөөр уласай зорилгото «Элүүрые хүгжөөлгэ» программын ёһоор шэнэ ФАП баригдаба гээшэ. Нютагайнгаа зоной түлөө баярланаб. Иимэ гоё, шэнэ эмнэлгын-акушерэй газар Утата нютагтам нээгдэхэдээ, ехэл һайн. Нютагай зоной бэеын элүүр энхэдэ ехэ нүлөөлхэ зэргэтэй. Үбшэнһөө һэргылхэл талаар, иишээ хандагты. Булта элүүр энхэ ябагты», - гээд Геннадий Доржиев хэлэнэ.
Уласай бюджедһээ 8,5 сая түхэриг барилгада, мүн байшан соохи оньһон түхеэрэлгэдэ гаргашалагдаа.
«Мүнөөдэр манай нютагта мүнөө үе сагай бүхы эрилтэдэ тааруу эмнэлгын-акушерэй газар нээгдэбэ. Би өөрөө 40 гаран жэл соо хүдэлжэ ябанаб. Иимэ шэнэ ФАП соо хүдэлхэ гээшэ жаргал. Гол түлэб элүүр энхэ ябая. Манай нютагай хүбүүндэ баяраа мэдүүлнэбди. Буряад Уласай Арадай Хуралай һунгамал Геннадий Доржиев шэнэ ФАП бариха талаар ехэ оролдолго гаргаһан байна. Үшөө үнинэй иимэ байшантай болохоёо хүсэдэг байгаабди. Дулаан, һаруул байшан соо нютагайнгаа зониие угтажа, һэргылэмжын талаар хүдэлмэриеэ үргэлжэлүүлхэбди», - гээд Утата нютагай эмнэлгын-акушерэй газарые даагша Сэсэгма Дымпилова тэмдэглээ.
