Улаан-Үдэ хотын Соведүүдэй талмай дээрэ шэнэ автобусуудай түлхюур барюулгын баяр ёһолол мүнөөдэр үнгэрбэ. Энэ хэмжээ ябуулгада Буряад Уласай Толгойлогшо Алексей Цыденов, Буряад Уласай Арадай Хуралай Түрүүлэгшэ Владимир Павлов гэгшэд хабаадаһан байна.
«Болбосоролой һалбарида удха шанартай үйлэ хэрэг боложо байна. Һургуулиинуудта 40 автобусуудай түлхюурнуудые барюулбабди. 7 жэлэй хугасаа соо 400 гаран автобусууд һургуулинуудта дамжуулагдаа. 340-ниинь федеральна һанһаа, 66-ниинь уласай ба нютагай засагай бюджедһөө», -гээд Владимир Павлов хэлээ.
Уласай нютагай засагай 18 байгууламжын һургуулинууд шэнэ автобустой болобо: Баргажанай, Бэшүүрэй, Яруунын, Загарайн, Захааминай, Ивалгын, Кабанскын, Хэжэнгын, Хурамхаанай, Мухар-Шэбэрэй, Муяын, Хяагтын, Ахын, Сэлэнгын, Прибайкалиин, Тарбагатайн, Хориин аймагууд, Северобайкальск хото, мүн тиихэдэ санаторно 28-дахи интернат һургуули, Буряадай Үндэһэ яһатанай 1-дэхи лицей-интернат, Сэлэнгын ба Эгэтын СКОШИ.
Шэнэ автобусууд гол түлэб аюулгүйгөөр үхибүүдые зөөхэ ёһотой гээд Владимир Павлов тэмдэглээ.
«Буряад Уласай Арадай Хуралай, засагай Газарай, мүн нютагай өөһэдын хүтэлбэриин эмхиин урда ехэ зорилгонууд табигдахадаа, хүүгэдые аюулгүй, һайн байдалда зөөхэ тухай ехэ ажал хэгдэдэг юм», -гээд Владимир Павлов хэлэһэн байна.
