Декабриин 1-дэ Буряад Уласай Толгойлогшо Алексей Цыденов албанайнгаа хэрэгээр Сэлэнгын ба Зэдын аймагуудаар ябаад ерэһэн байна. Тэндэ залуушуулай хоер түб нээгдээ.
«Ехэ һайн түбүүд нээгдэбэ гээшэ. Эндэ залуушуул ерэжэ, уулзаха аргатай. Һанаһан хүсэлөө бэелүүлхэ, бэеэ бэетэйгээ танилсаха, дүй дүршэлөөрөө хубаалдаха. Гусиноозерскын мүн Петропавловкын ажаһуугшадые амаршалнаб», -гээд Алексей Цыденов хэлээ.
Иимэ залуушуулай түбүүд байгуулагдахадаа, залуушуулай хэрэгүүдэй талаар Федеральна түбэй шанар шэнжэтэйгээр нээгдэһэн байна. Найман сэдэбээр хүдэлхэ зорилго табигдана.
Буряад Уласта эгээл түрүүшүүлэй дунда Сэлэнгын аймаг иимэ түб нээһэн байна. Байшаниие һэльбэн шэнэлхэ талаар ехэ ажал ябуулагдаа. Мүнөө үе сагай бүхы эрилтэдэ таруугаар зохёоһон байна. Түймэрэй дохео, видеохаралга тэндэ хуу хэгдээ.
Зэдын залуушуулай түб соо мүн лэ ехэ заһабарилга хэгдээ. Байшанай хушалта һэлгэгдээ юм, хажуугаарнь хана, шала гэхэ мэтэ сэхэлэгдэһэн байна. Интерактивна оньһон түхеэрэлгэнүүд, мебель абтагдаа.
«Залуушуулай можо нютаг» гэһэн бүхэроссин мүрысөөндэ илажа, энэ хоер түсэлнүүд бэелүүлэгдэһэн байна. Россин Юрэнхылэгшэ Владимир Путинай зарлигаар үндэһэтэнэй «Болбосорол» гэһэн проектын хүсөөр шэнэ түбүүд нээгдэһэниие онсо тэмдэглэлтэй.
Энэ үдэр медиа һургуули эмхидхэгдэжэ, мэргэжэлтэд, блогернууд ба «Буряад ТВ» гээд эрдэм мэдэсээрээ хубаалдаһан байна.
Залуушуулай нэгэ дороо уулзажа хүдэлхэ, һонин шэнэ түсэлнүүдээрээ хубаалдаха арга үгтэжэ, ерээдүйдэ бүри һонин проектнууд бэелүүлэгдэхэнь лабтай.
