Буряад Уласай Толгойлогшо Алексей Цыденов албанайнгаа хэрэгээр Хориин аймагаар ябахадаа, тэндэхи ажаһуугшадтай уулзалга үнгэргэһэн байна. Тохорюукта, Тээгдэ, Хасуурта, мүн Хори нютагууд дээрэ уулзалганууд эмхидхэгдээ. Түлеэ бэлдэхэ асуудал, барилгын мүн харгы заһабарилга тухай бэрхэшээлнүүдые хүн зон хэлээ.
«Аймаг соогуур хүн зониие зөөдэг автобусуудай талаар асуудал байна. Аймагай түб хүрэтэр автобус ябана, харин Тохорюуктаһаа аймагай түб хүрэтэр хүрэхэнь бэрхэшээлтэй. Энэ асуудал шиидхэхэ арга олохобди», -гээд Алексей Цыденов хэлээ.
Тохорюукта дээрэ оршодог хүүргэ олоной һанаа зобооно. Буряад Уласай Толгойлогшын мэдээсэһээр, нүгөө жэлдэ хүүргэ заһабарилгада мүнгэн оруулагданхай.
Түлеэ бэлдэлгын асуудал шухала болоод байна. Алексей Цыденов тус бэрхэшээл хараадаа абажа, шиидхэхэ тухай хэлээ.
Эмнэлгын һалбарида хабаатай асуудалнууд олоор ороо. ФАП-уудай хүдэлхэ гурим, мэргэжэлтэдэй дутагдалга гэхэ мэтэ асуудалнуудта харюунууд үгтэһэн байна. Хориин аймагай түбэй эмнэлгын байшанай лаборатори соо вентиляци үгыһөө боложо, ажал тогтонхой. Буряадай Толгойлогшо энэ хэрэгтэ мүнгэ олохо тухай захираа. Нүгөө жэл Хоридо шэнэ поликлиника нээгдэхэ тухай мүн лэ дуулгаһан байна.
«Асуудалнууд олон. Бүхы ороһон асуудалнуудые бэшээд абаабди, саашань ажал ябуулхабди», -гээд Алексей Цыденов хэлэһэн байна.
